Ho'ararecha Colonia Emilio Acevedo-pe, táva Santa Rosa de Lima, Misiones ryepýpe. Isy héra Ceferina Figueredo Fernández ha itúva katu karai Cecilio Alcaraz Galeano. Ipehẽnguekuéra apytépe ha'e oĩ 11 hápe ha ikyvykuéra imitãvéva ichugui oĩ mbohapy.
Oñemoarandu ñepyrũ mbo'ehao hérava "Defensores del Chaco"-pe, ary 1975 guive ary 1980 peve. Uperire ohasa mbo'ehao Parroquial "Santa Rosa de Lima"-pe, upépe omohu'ã imbo'esyry, ary 1986 me.
Oñembokatupyryve haguã rehehápe, oñemboja táva Paraguaýpe ha upépe oike Instituto Superior de Educación ‘'Dr. Raúl Peña"-pe ha omohu'ãvo imbo'esyry oiko ichugui mbo'ehára Guarani, Castellano ha Ñe'ẽporãhaipyrepegua.
Ombojoapyvévo tape arandu rekávo oipykúiva, oguãhẽ Escuela Municipal de Locución pe ha upépe oñembokatupyry oiko peve ichugui ñe'ẽmyasãihára, ary 1993 pe. Péva ári ohapykuererekave kuaapy Facultad de Filosofía pe, oiko peve ichugui Licenciada en Letras, ary 1996 me.
Ary 2000 pe omoñepyrũ Universidad Católica "Nuestra Señora de la Asunción"-pe peteĩ mbo'esyry omongakuaave haguã ikuaapy ñe'ẽnguéra rehegua ha upépe ohupyty kuatia omoañetéva ichupe Magíster en Lingüística Aplicada, con énfasis en Enseñanza de Segunda Lengua y Educación Bilingüe (Castellano-Guaraní) ramo.
Ary 2005 pe, ohupyty UNED (Universidad de Educación a Distancia-España) gui kuatia omboajéva ichupe Experto Universitario en Educación de Personas Adultas ramo. Uperiremínte, ary 2007 me ojeporavo ichupe, 53 hapicha mbo'ehára ndive, oho haguã oñembokatupyry Universidad de Viña del Mar, Chile retãme. Upépe ohupyty kuatia omboajéva ichupe Magíster en Educación, Mención Aprendizaje y Medios ramo. Ary 2008 pe omohu'ã mbo'esyry Gestión Educativa rehegua, oisãnmbyhyva'ekue ISE ha Fundación Tercer Milenio.
Hembiapo rapykuerére ikatu jajuhu omba'apohague mbo'eháraramo ko'ã mbo'ehaópe: Escuela de Suboficiales de la Fuerza Aérea (EFSOFAER), Colegio Sagrado Corazón de Jesús (Luque), Colegio Nacional "Cerro Corá" (Trinidad, Paraguaýpe) ha Colegio "El Sembrador" (Paraguaygua) pe. Upéicha avei ombo'e Instituto Superior de Educación "Dr. Raúl Peña", Facultad de Lenguas Vivas, Escuela Municipal de Locución, Facultad de Filosofía (UNA), IDELGUAP, Universidad Autónoma de Asunción ha Universidad Católica "Nuestra Señora de la Asunción"-pe. Oipytyvõ heta mbo'ehavusúpe ha motenondeharakuérape ombokatupyry haguã mbo'eharakuérape ñane retã ryepýpe.
Péicha avei omba'apo iñirũ mbo'eharakuérandi oguenohẽ haguã aranduka opaichagua ikatukuaáva ojeporu mbo'ehakotýpe. Umíva apytépe oĩhína: Guías Didácticas para el aprendizaje de Guaraní como Lengua Materna; Área Comunicación: Español 2ª Lengua, 1º y 2º grados; Guías de Adecuación Curricular en el Contexto Regional, 1º, 2º y 3º grados, Área Comunicación: Guaraní – MEC-Itaipú Binacional; Programa de Lengua Castellana del 3º curso del Profesorado de Educación Escolar Básica- Departamento de Currículum-MEC; Libro Lengua y Literatura Castellano-Guaraní (Sección Guaraní) del 8º y 9º grados. Editorial Santillana - En Alianza; Materiales para docente del área de Comunicación (Momarandu mbo'esyry peteĩha, mokõiha ha mbohapyha) y fichas para alumnos de 1º, 2º y 3º grados. Ombojere guaraníme Manual "Tekoha takate'ỹmby, Cordillera, un ambiente digno de ser cuidado" vore; omboguata hemimbo'ekuérandi Ne'ẽryru guarani-guarani Ñe'ẽmyesakãha, 1ha (2002-me) ha 2ha (2004-pe); omotenonde guaraníme Revista hérava "Desde el Aula" Nº 20, 21, 22, 23, 24, 25, 26 ha 27; ombohape iñirũnguéra ndive Revista Científico-Pedagógica "Kuaapy Ayvu", ISE guive osẽva; ohai aranduka hérava "Las TIC en contextos de formación. Una mirada desde la experiencia" ha "Pensamientos del Bicentenario" ryepýpe.
Ambue hembiapo apytépe oho avei, oñehenói jave ichupe, oñe'ẽ haguã aty guasuhápe ñane retã ryepýpe ha tetã ambue rehe, ko'ã mba'e rehe: guarani ñehekombo'e; ñane retã ñe'ẽkõi; ñe'ẽnguéra ñehekombo'e rape; guarani ñe'ẽ jeporu, mba'éichapa mbo'eharakuéra oñembokatupyry nane retãme ha umícha.
Ára 16 jasypoapy guive oisãmbyhy Paraguái Ñe'ẽnguéra Sãmbyhyha.