Logotipo.png
Sãmbyhyhára Alcaraz ohesa’ỹijóta jekuaapy ko árape México retãme
Publicado: 06/14/18 08:18:a. m.

Paraguái Ñe’ẽnguéra Sãmbyhyhára, Ladislaa Alcaraz de Silvero, ohesa’ỹijóta peteĩ jekuaapy ñe’ẽnguérareñemba’apo Paraguáipe rehe. Kóva oikóta ko arapópe peteĩ amandaje guasu hérava “Primer Congreso Internacional de Fomento a la Lectura en Lenguas Indígenas”, oikótava Oaxaca távape, México retãme.

Ko amandaje guasu rupive niko ojehesa’ỹijose mba’éichapa oĩ ko’ag̃aitéramo ypykuéra ñe’ẽnguéra ñemoñe’ẽ ha ñemoñe’ẽverã ha avei ijepuru ayvúpe; ha péichape ikatúta oñemoherakuãve ha oñemoheñói tapicha aty oñemoñe’ẽ hag̃ua, taha’e México-pe térã ambue tetãre.

Sãmbyhyhára Alcaraz ohesa’ỹijóta ikuaapy ko 18:00 aravo jave ha oñe’ẽta guarani rehe, Paraguái ñe’ẽ tee háicha, mba’eichagua ñe’ẽpa ha mba’e tapépa oipykuiva’erã ojepuru añete hag̃ua Estado tuichakue. Ijehaipy, opa ñe’ẽ teéicha, ijepuru ambue, ogapy térã ojeikoharupiguáigui ojepurúvo kuatia teépe ha ambue henda rupi, araka’eve ojepuru’ỹhápe; avei ohesa’ỹijóta guarani ñe’ẽ jehai.

Sãmbyhyhára Alcaraz oñe’ẽta avei ypykuéra ñe’ẽnguéra jehairã jegueroguatáre; mba’éichapa oñemba’apokuaa ojehai hag̃ua ko’ã ñe’ẽme; umi oporomongu’ekuaáva ojehai ha oñemoñe’ẽ hag̃ua, ha umi mba’e ojejapómava PÑS guive ojeporomokyre’ỹ hag̃ua oñemoñe’ẽ ha ojehaívo ypykuéra ñe’ẽme.

Ko amandaje guasu rupive, oikótava 14 guive 16 peve ko jasypoteĩme, ojekuaaukáta opa mba’e ojejapómava umi 10 tetãme, haimete 70 tapicha arandu rupive; ha’ekuéra ohesa’ỹijóta mba’eichaitépa oĩhína hetãnguéra ypykuéra ñe’ẽme jehai, ñeñe’ẽ ha iñemoñe’ẽrã.

Ko “Primer Congreso Internacional de Fomento a la Lectura en Lenguas Indígenas” niko ombosako’i Secretaría de Cultura del Gobierno, México pegua, Secretaría de las Culturas y Artes ha heta temimoĩmby ko tetã ha ambueve pegua ñepytyvõme.


Compartir esta noticia

Últimas Noticias Publicadas