Logotipo.png
SÃMBYHYHÁRA ALCARAZ OHESA’ ỸIJO PARAGUÁI ÑE’ẼNGUÉRA REKO, VILLARRICA TÁVAPE
Publicado: 09/09/17 08:33:a. m.

Omboheraguapypa rire kuatiáre ñe’ẽme’ẽ Paraguái Ñe’ẽnguéra Sãmbyhyha (PÑS) ha Universidad Nacional de Villarrica del Espíritu Santo (UNVES), Sãmbyhyhára Ladislaa Alcaraz de Silvero ohesa’ỹijo Paraguái ñe’ẽnguéra reko; guarani ñe’ẽ reko ha henonderã. Ko aty guasu oiko kuri kuehe pyhare, UNVES Rectorado koty guasúpe.

Sãmbyhyhára Alcaraz oñe’ẽ ñane retã ñe’ẽ teekõi rehe ha mba’éichapa Estado oku’eva’erã ñe’ẽ tee ári; avei ohesa’ỹijo mba’eichagua ñe’ẽkõietápa jajuhukuaa ñane retãme. Oñe’ẽ avei guarani apo’i rehe castellano rovake. “Ñane retãme ojehechag̃ive ñe’ẽ ojeporuvéva”, he’i.

He’i avei peteĩ ñe’ẽtee ndoikoveiva’erã tavarandúpe añónte, ojeporumemeva’erã mamo henda rupi ha opa mba’erã. “Estado tuichakue javeve voi oikoveva’erã ko ñe’ẽ teépe”, ombojo’a Alcaraz.

Ko joaju rupive oñeñeha’ãta ojegueroike ko mbo’ehaovusúpe guarani ñe’ẽ jehekombo’e ha guarani rupive jehekombo’e; oñembohapéta avei mburuvicha, mbo’ehára ha temimbo’ekuéra jehekombo’e ojegueroike kyre’ỹ hag̃ua guarani jeporu meme mamo henda rupi ha opa mba’erã.

Oñembohapéta avei ñe’ẽ raperekarã, ha mokõive ñane ñe’ẽtee, ypykuéra ñe’ẽ ha pytaguay ñe’ẽ ñemoasãi ha ñeñongatu.

Ko kuatia omboheraguapy Paraguái Ñe’ẽnguéra Sãmbyhyhára, Ladislaa Alcaraz de Silvero, ha UNVES Moakãhára, Simón Benítez Ortiz. Ohecha ha ohendu chupekuéra mburuvicha, mbo’ehára ha temimbo’ekuéra upe mbo’ehaovusu pegua.


Compartir esta noticia

Últimas Noticias Publicadas