Logotipo.png
PÑS GUIVE OJEYKEKO “TEST DE COMPETENCIA LINGÜÍSTICA” JEGUEROGUATA CAAZAPÁ TAVUSÚPE
Publicado: 03/17/17 08:18:a. m.

Ko arapokõindy, 13 jasyapy guive 15 peve, aponde’a «La educación primero, todos por Caazapá», ryepýpe ojegueroguata Test de Competencia Lingüística(TCL) mayma mitã temimbo’e primer grado-gua umi 350 mbo’ehaópe, 11 distrito ryepýpe, ko Tavusúpe. Ko TCL jegueroguata omoirũ Paraguái Ñe’ẽnguéra Sãmbyhyha mba’apoharakuéra.

Umi aranduchauka osẽ Tekombo’e ha Tembikuaa Moakãharapavẽ guive ha omoañete opa mbo’ehára primer grado gua, ojehechakuaa hag̃ua mitã ñe’ẽ ypy.

Ko TCL ningo tuichaiterei mba’e ombohapétare mba’e ñe’ẽmepa ojehekombo’e ñepyrũta mitãme, guaraní térã castellano-pe, he’ihaichavoi Unesco, mitãme ojehekombo’e ñepyrũramo iñe’ẽ ypýpe omokyre’ỹvétachupe iñaranduvévo opa ambue mba’épe ha oikuaa pya’evéne avei ambue ñe’ẽ.

Ambue tembijehecha he’i avei «Han demostrado de modo fehaciente que se aprende más fácilmente una segunda lengua cuando se ha aprendido bien una primera lengua antes […] por ello, no recibir las enseñanzas en la lengua materna puede significar para los niños una clara desventaja con vistas a su futura trayectoria de aprendizaje» (Campaña, 2016).

Ko TCL jegueroguata ko’ág̃a peve Caazapá-pe añónte gueteri ojejapo. Hákatu omomba’éma heta ambue temimoĩmby mburuvichakuéra, upévare oñehenói kuri chupekuéra oho hag̃ua ohecha mba’eichaitépa ojejapo, ikatu hag̃uáicha oiporu avei hikuái.

Upéicha, Paraguái Ñe’ẽnguéra Sãmbyhyha guive, omotenondéva mokõi moakãharapavẽ ha mbohapy ambue mba’apohára, omoirũkuri ko TCL jegueroguata. Oĩ avei Comisión Nacional de Bilingüismo ha Guarani Ñe’ẽ Rerekuapavẽ rérape omoirũva.

Ko TCL ojejapo mboyve, oñemoarandu 65 coordinador, 20 supervisor ha técnico-kuérape, oykeko hag̃ua mbo’eharakuérape ha oñe’ẽ hag̃ua sy ha túva ndive tuichaiterei mba’ehahína mitãme ojehekombo’e iñe’ẽ ypýpe.

Upérõ ojehechauka peteĩ ta’angaku’e oñe’ẽhápe Paraguái Ñe’ẽnguéra Sãmbyhyhára, Ladislaa Alcaraz de Silvero, he’ihápe tekotevẽha ojehekombo’e mayma mitãme iñe’ẽ ypýpe; Paraguái ha’eha tetã iñe’ẽteekõiva ha ani araka’evéma oñepyrũ mitã derécho rehe. Oñembo’e ñepyrũramo mitãme ñe’ẽ ambuépe oñepyrũhína iderécho rehe.

Omoirũ avei Coordinadora Departamental de Supervisiones Educativas, kuñakarai Liliana Villalba, ha’e omombe’u mba’éichapa ojeipykuihína tenonde gotyo mayma tekomb’e ryepypegua ndive, upéicha rupi ko’ág̃a ojeporukuaa Caazapá-pe techapyrãramo.

Ko aponde’a «La educación primero, todos por Caazapá», oipytyvõ Unión Europea, Juntos por la Educación ha consejo Departamental de Educación de Caazapá.

Umi coordinador omomba’eterei ko taller ha he’i omoirũmbaitetaha umi ojejeruréva chupekuéra. Ko’ãicha oñemyatyrõ ha oñemoporãvéne ko’ẽ rei rehe tekombo’e mitãme ñane retãme.

Mitãme jehekombo’e iñe’ỹ ypýpe oñemoañete hag̃ua tekotevẽ maymáva ñañoipytyvõ jojapa.


Compartir esta noticia

Últimas Noticias Publicadas