Logotipo.png
OSẼTA NOVÉLA OJEHAÍVA GUARANÍME “TATUKUA”
Publicado: 03/07/17 10:42:a. m.

Ag̃a arapoteĩ 10 jasyapýpe 19:00 aravo jave ojeikuaaukáta novéla ojehaipaitéva guarani ñe’ẽme añónte hérava Tatukua. Haihára peteĩ mitãrusu Guairá tavusu pegua, Arnaldo Casco, hetáma oñembojopóiva ihaipyrére.

Ko aranduka jeikuaauka oikóta Centro Cultural de la República El Cabildo (Avda. República ha Alberdi)-pe ha oñe’ẽta hese Paraguái Ñe’ẽnguéra Sãmbyhyhára, Ladislaa Alcaraz de Silvero; Guarani Ñe’ẽ Rerekuapavẽ Yta, Domingo Aguilera; ha Guarani Ñe’ẽ Rerekuára, Mauro Lugo.

Heta mba’e rehe oñe’ẽ ko novéla Tatukua, itenondevenehína teko ambue ha mba’evai gueru osẽramo peteĩ tapicha hekoha térã haitýgui. Upéichante avei, ko aranduka oñe’ẽ teko, tekove, ñe’ẽ, arandupy, tavarandu, mba’ejeroviapy, mombe’ugua’u, tekoha porã, yvypóra reko asy ha tekove okára rehe.

Ñama’ẽ ha ñahesa’ỹijótaramo hetepy ha máva mávape omombe’u oikóva, mba’eichagua mombe’upýpa, oikokuaátava (ndoikokuaáitava), tenda ojeporúva, ha ambueve mba’e ojeporu porãitemi avei ko novélape. Apytu’ũ ñemongu’e rehegua katu ñañe’ẽ existencialismo, peteĩchante ohecháva ivai ha iporãva ha mba’egueroviaparei rehe. Ko novéla réra, Tatukua, ikatu ombopy’aporandu hetápe, ha añetehápe ikatu heta mba’e he’ise, omoñe’ẽva ha omoñe’ẽmba rirémante ombohovaikuaátava.

Karai Domingo Aguilera, omoñe’ẽ ñepyrũvo ko novéla, ohai: “Péicha (Tatukua) omoñepyrũ guaraníme mombe’upy hape hetáva, ombohováivo vaicha karai Augusto Roa Bastos haireko, estilo, karaiñe’ẽme”. Omomba’e guasu avei guarani rekovépe g̃uarã ko novéla osẽva, ko ñe’ẽ opáyvaicha ohóvo ha opo tenonderã mbeguekatúpe.

Paraguái Ñe’ẽnguéra Sãmbyhyhára, omoñe’ẽ ñepyrũvo ko novéla, omomba’e guasu avei guarani ojeporúre hekoitépe ojehaikuévo, ha opa umi oñemombe’úva jeko oñemoha’angapavoi ojehaikuévo. Ohenóivo mayma mbo’ehára, temimbo’e, jetypekahára, ha mayma ñe’ẽhárape hoy’u hag̃ua ko haipy pyahúgui hetaite mba’ekuaa payhu oikuave’ẽva ko haihára pyahu guaraníme.

Sociedad de Escritores del Paraguay (SEP), peteĩ ñoha’ãme upe ary 2013 ramo, ombojopoiva’ekue ko novéla Tatukua. Osẽ hag̃ua péina kuatiápe, oipytyrõ mbarete Fondo Nacional de la Cultura y las Artes (Fondec) ha ombokuatia Servilibro S. R. L.; ohai chupe ñe’ẽñepyrũ Paraguái Ñe’ẽnguéra Sãmbyhyhára, Ladislaa Alcaraz de Silvero, ha Guarani Ñe’ẽ Rerekuapavẽ Yta, Domingo Aguilera.

Haihára, Arnaldo Casco, oko’ẽrechava’ekue tava’i Colonia Agustín Molas, Borja (Guairá)-pe. Oñemoarandu Locutor y Animador de Radio y Televisión-pe; Licenciatura Guarani, Ateneo de Lengua y Cultura Guaraní-me; ha Licenciatura en Letras, Facultad de Filosofía (Universidad Nacional de Asunción)-pe. Jasypateĩ, ary 2013 guive omoakã Departamento de Comunicación Institucional, Paraguái Ñe’ẽnguéra Sãmbyhyhápe.

Ko aranduka Tatukua ojejuhúta Servilibro-pe, térã haihára ndive 0971 179 141 rupive.


Compartir esta noticia

Últimas Noticias Publicadas