Logotipo.png
​Oñemoneĩma Instituto Iberoamericano de Lenguas Indígenas jeguerojera
Publicado: 05/06/21 09:12:a. m.

Aty guasu XXVII Cumbre Iberoamericana de Jefes de Estado y de Gobierno javeve, oikova’ekue upe 21 jasyrundýpe Soldeu, Andorra-pe, oñemoneĩ Instituto Iberoamericano de Lenguas Indígenas (IIALI) jeguerojera, omongu’étava oñeñangareko ha ojehetejora hag̃ua opa umi ypykuéra ñe’ẽ oikovéva América Latina-pe, ombohape ha omoañetévo tembiaporãnguéra ñe’ẽ ha arandupy rehegua, ojepuru, oñemoasãi ha oñeñangareko hag̃ua hesekuéra.

Ko IIALI aporã ojejerurékuri XXVI Cumbre Iberoamericana de Jefes de Estado y de Gobierno ramo guare Organización de Estados Iberoamericanos para la Ciencia y la Cultura (OEI), Secretaría General Iberoamericana (SEGIB) ha Fondo para el Desarrollo de los Pueblos Indígenas de América Latina y El Caribe (FILAC)-pe.

Paraguái, Paraguái Ñe’ẽnguéra Sãmbyhyha (PÑS) guive, ary ohasava’ekue guivéma, oykeko kyre’ỹ oúvo ko IIALI jeguerojera, político ha técnico upe ñeipytyvõ oikuave’ẽva ñane retã, ikatu hag̃uáicha ojeguerojera ha oguata opa umi apopyrã ha jehupytyrãnguéra ojeguerekóva.

“Ojejesarekóvo Paraguái reko rehe, tetã iñe’ẽ tee mokõiva ha ohechakuaáva tuicha mba’eha ypykuéra ñe’ẽ, ko ojejapóva tuichaiterei mba’e ha ijeykeko tekombo’épe ha técnico rupive, PÑS guive, ojehechaukamavoi oguata ñepyrũ guive”, he’i peteĩ kuatiahai pehẽ oguerahaukáva Cancillería Paraguái pegua he’ívo omoirũha ko mba’e guasu apo.

PÑSpe g̃uarã, opa umi IIALI ohupytyséva oma’ẽ porãhína ypykuéra ñe’ẽita ko yvy pehẽ guasu pegua rehe tove toñeñangareko, taimbarete jey, toñeñongatu, toñemombarete ha toñemomba’e jey.

“Rohecharamoiterei omoirũ rehe avei opa umi añetehápe oĩva ko apopyrã guasu: kuña, mitãkuña ha mitãkuimba’erusu, oipurúva iñe’ẽ tee, ñanderesarai’ỹ rehe avei umi ituja ha iñarandúvagui, oñangarekóva akóinte iñarandupykuéra rehe; upéichante avei, tetãnguéra remimoĩmby”, oñemombe’u PÑS guive.

Ko IIALI jeguerojera rupive, XXVII Cumbre Iberoamérica de Jefes de Estado y de Gobierno ombojo’a oykekoha América Latina pegua ypykuéra atýpe, ha maymáva oiko hag̃ua peteĩcha iderechokuéra rovake, avei oñemomba’e ha oñemoasãi hag̃ua arandupy ha ñe’ẽ derechokuéra.


Compartir esta noticia

Últimas Noticias Publicadas