Logotipo.png
Guarani Ñe’ẽ Rerekuapavẽ oguenohẽta peteĩha hemimyasãi tembikuaa ha ñe’ẽporã rehegua
Publicado: 02/05/19 12:02:p. m.

Guarani Ñe’ẽ Rerekuapavẽ (Academia de la Lengua Guaraní) oguenohẽta peteĩhaite hemimyasãi tembikuaa ha ñe’ẽporã rehegua mokõi ñe’ẽme (guarani ha castellano)-pe. Oikóta ág̃a 8 jasykõime, ko arapoteĩme, 19:00 aravo jave, Ateneo Cultural Lidia Guanes rógape, opytáva Pastora Céspedes 1605, Los Laureles tava’ípe.

Oikuaaukáta ko temimyasãi Tetã Arandupy Sãmbyhyhára, Rubén Capdevila. Upéi, Guarani Ñe’ẽ Rerekuapavẽ rérape omyesakãvéta tembiapo oñemyasãiva rehegua terekuarakuéra, Almidio Aquino, Susy Delgado ha Mario Rubén Álvarez. GÑR remimyasãi ombokuatiákuri Servilibro.

Ko temimyasãime ojejuhúta heta ñemoñe’ẽrã, hetave jey ojehaíva guaraníme. Ãva apytépe oĩ Guarani Ñe’ẽtekuaa (Gramática de la Lengua Guaraní), ohesa’ỹijóva GÑR Yta, Carlos Ferreira; ha’e omyesakã umi mba’e ojehupytyveva’ekue ko aranduka rupive, osẽva’ekue ary ohasava’ekuépe.

Avei, haipy hérava “Ñe’ẽryru apo oñepyrũma”, Paraguái Ñe’ẽnguéra Sãmbyhyhára, Ladislaa Alcaraz de Silvero, rembiapokue, oñeñe’ẽhápe GÑR Ñe’ẽryru apo ñemoñepyrũ rehe. Oguereko avei Guarani Ñe’ẽ Rerekuapavẽ rembiasa, ohaiva’ekue Yta Mirã, Almidio Aquino.

Ñe’ẽporã rehegua haipyre puku oguereko avei ko aranduka osẽtava. Ãva apytépe oĩ ñe’ẽpapára Lino Trinidad, Feliciano Acosta, Mauro Lugo, Ramón Silva, Lucino Rodríguez, Susy Delgado, Domingo Aguilera, Indalecio Riquelme ha Mario Rubén Álvarez rembiapokue; ha mombe’urã gua’u haihára Tadeo Zarratea, Hugo Centurión, Arnaldo Casco ha Lilian Aliente rembiapokue.

Heta ambue kuaapy guarani ñe’ẽ rehegua, terekuára Miguel Verón ha Bernarda Ortellano rembiapokue, oguereko avei ko GÑR remimyasãi peteĩha.


Compartir esta noticia

Últimas Noticias Publicadas